የአገር አቀፍ የሕግ ተርጓሚዎች መድረክ የፍትሕ አስተዳደሩን ለማጠናከር ወሳኝ ሚና አለው — ክቡር አቶ አለምአንተ አግደው

ባሕር ዳር፣ መስከረም 30/ 2019(የአማራ ክልል ጠቅላይ ፍርድ ቤት)

የአገር አቀፍ የሕግ ተርጓሚዎች መድረክ በፌዴራልና በክልል ፍርድ ቤቶች መካከል የልምድ ልውውጥን፣ ትብብርንና ቅንጅትን በማጠናከር የአገሪቱን የፍትሕ አስተዳደር ለማዘመንና የዳኝነት አገልግሎትን የበለጠ ለማሻሻል ወሳኝ ሚና እንዳለው የአማራ ክልል ጠቅላይ ፍርድ ቤት ፕሬዝዳንት ክቡር አቶ አለምአንተ አግደው ገልጸዋል።

ክቡር ፕሬዝዳንቱ ይህን የገለጹት መስከረም 30 ቀን 2019 ዓ.ም በባሕር ዳር ከተማ በተካሄደው የአገር አቀፍ የሕግ ተርጓሚዎች ልዩ ጉባኤ መክፈቻ ላይ ባደረጉት የእንኳን ደህና መጣችሁ ንግግር ነው። በጉባኤው የፌዴራል ጠቅላይ ፍርድ ቤት ፕሬዝዳንት ክቡር አቶ ቴዎድሮስ ምሕረትን ጨምሮ የክልል ጠቅላይ ፍርድ ቤት ፕሬዘዳንቶች እና የአዲስ አበባና የድሬዳዋ ከተማ አስተዳደር ይግባኝ ሰሚ ፍርድ ቤት ፕሬዝዳንቶች ተገኝተዋል።

ክቡር አቶ አለምአንተ አግደው እንዳብራሩት፣ በፌዴራልና በክልል ፍርድ ቤቶች በየራሳቸው እየተከናወኑ ካሉ የለውጥ ሥራዎች በተጨማሪ በጋራ በመድረኩ መገናኘት የተሻሉ ተሞክሮዎችን ለመለዋወጥ፣ የጋራ ችግሮችን ለመመርመርና ተቀናጅቶ ለመሥራት ዕድል ይፈጥራል። ይህም የዳኝነት አገልግሎት ድንበር ተሻጋሪ ተደራሽነትን ከማሳደግ ባለፈ የፍትሕ አስተዳደሩ የበለጠ ዘመናዊና ውጤታማ እንዲሆን አስተዋጽኦ ያደርጋል።

መድረኩ ቀደም ሲል በዳኝነት ትራንስፎርሜሽን የተመዘገቡ ውጤቶች ተቋማዊና ዘላቂ እንዲሆኑ የሚያግዝ ሲሆን፣ ለሌሎች የፍትሕ ዘርፎችም ምሳሌ የሚሆን የቅንጅት አሠራር እንደሚፈጥር ክቡር ፕሬዝዳንቱ ጠቁመዋል። በተጨማሪም በሕግ አውጭውና በሕግ አስፈጻሚው አካላት መካከል የተቀናጀና የተናበበ አሠራር እንዲጎለብት አዎንታዊ ተጽዕኖ ይኖረዋል ብለዋል።

የዳኝነት አካሉ የሚኖረውን ሰፊ ማኅበራዊና ኢኮኖሚያዊ ሚና በማስመልከትም፣ የሕግ የበላይነትን ማረጋገጥ፣ የሰብዓዊ መብቶችንና ነጻነቶችን ማክበር፣ ለንግድና ለኢንቨስትመንት ምቹ ሁኔታ መፍጠር እንዲሁም የማኅበረሰቡን ሰላምና ደኅንነት ማስጠበቅ የዳኝነት አካሉ ከሚወጣቸው ቁልፍ ኃላፊነቶች መካከል እንደሆኑ ገልጸዋል።

ለእነዚህ ኃላፊነቶች ተገቢውን ምላሽ ለመስጠት የዳኝነት ነጻነትና ተጠያቂነትን በማረጋገጥ፣ ለፍትሕ ፈላጊው ማኅበረሰብ ከአድልዎ የጸዳ፣ ወጪ ቆጣቢ፣ ፈጣንና ጥራት ያለው አገልግሎት መስጠት እንደሚገባ አሳስበዋል።

የአማራ ክልል ጠቅላይ ፍርድ ቤት ከፌዴራሉና ከሌሎች የክልል ጠቅላይ ፍርድ ቤቶች እንዲሁም የከተማ አስተዳደር ፍርድ ቤቶች ጋር በመተባበር መድረኩ እንዲጠናከርና ቀጣይነቱ እንዲረጋገጥ የበኩሉን ድርሻ እንደሚወጣ ክቡር ፕሬዝዳንቱ በንግግራቸው አረጋግጠዋል።

የአገር አቀፍ የሕግ ተርጓሚዎች መድረክ የፍትሕ አስተዳደሩን ለማዘመን፣ የዳኝነት ነጻነትንና ተጠያቂነትን ለማጠናከር እንዲሁም የፍትሕ አገልግሎትን ተደራሽና ውጤታማ ለማድረግ የጋራ ርብርብን የሚያበረታታ መድረክ መሆኑን ክቡር አቶ አለምአንተ አመልክተዋል።